حزين النـّــاي
علي حسين كاظم
كندا
بسكوت روحي ردّت للسهر
والعين ردّت بوشالة فرح
والفرح مخنوك وطفح بيه القهر
وكلشي انفضح
وك يا فرح..؟
شديت جرحي
والجرح من شدته
فاض وفضح
وك يافرح..؟
جفـْلت بروحي الهلاهل
حلم عطشان
يوِج وينطفي ع الماي
بسَرَاب
الروح
وك يافرح..؟
ولك .. وين أروح
بسكوت صار العرس
ماحسبت هيجي
تصبح ليالينه حزن
ورموش الليالي خوف
أوف
بسكوت رديت احصد بروحي
مثل حصوة ليل تجدح ظيم
وتطيح ارماد
وك يا فرح..؟
بسكوت ابوكَن فرحتي
ووشاله ظلت بالعمر
تروط ويه الليالي حزن
حزن يجر جرة ناي
حزين الناي
حزين الماي
وحزين الكل كتر
بيّه..
وحزين الكل كتر
بيّه
****************************
iraq_50@hotmail.com
_____________________________________